Чычкандагы жол кырсыгынан жаракат алгандардын бири наристе кыз, ал ооруканада

Бишкек-Ош унаа жолундагы Чычкан капчыгайында жол кырсыгынан жаракат алган 3 адамдын арасында 6-7 жаштагы кыз бар, ал оорукананын жандандыруу бөлүмүндө жатат. Бул тууралуу бүгүн, 14-январда Саламаттыкты сактоо министрлигинин басма сөз кызматынан билдиришти.

"56 жаштагы жабырлануучу жеңил жаракат алганы үчүн ага биринчи медициналык жардам көрсөтүлүп үйүнө коё берилди. Калган 2 жабырлануучу учурда ооруканада дарыланууда. Алардын бири 20 жаштагы жигит, ал оорукананын хирургия бөлүмүндө, экинчиси 6-7 жаштагы кыз жандандыруу бөлүмүндө жатат. Экөөсүнүн тең денелеринде көптөгөн сыныктар бар", - дешти мекемеден.

Айта кетсек, кечээ, 13-январда Бишкек-Ош унаа жолунун Чычкан капчыгайында болгон жол кырсыгынан 4 адам каза болуп, 3 адам ар кандай деңгээлдеги жаракаттарды алган.