Ысык-Көлдө күйүп кеткен "Осьминог" кафесинин ээси кайтарууга алынды

Ысык-Көлдө күйүп кеткен "Осьминог" кафесинин ээси кайтарууга алынганын ИИМдин маалымат кызматынан бүгүн, 18-январда кабарлашты. Маалым болгондой, кафе ээси Аскат Асанкадыровдун коопсуздугуна коркунуч жаралып жаткандыгы айтылгандыктан ИИМдин мамлекеттик коргоо башкармалыгы тарабынан кайтарууга алынды.

7-январь күнү түн ичинде Ысык-Көлдүн Бостери айылындагы "Осьминог" кафесин белгисиз бирөөлөр өрттөп кетишкен. Козголгон кылмыш иштин алкагында ИИМдин ыкчам каттоосунда уюшкан кылмыштуу топтун мүчөсү катарында турган Ысык-Көл облусунун эки тургуну кармалган жана алардан баңгизат, курал-жарактар алынган.

"Факт боюнча мыйзам чегинде тиешелүү ыкчам тергөө жана иликтөө иш-чаралары жүрүп жатат. Аталган факт боюнча мыйзамсыз курал-жарактарды жана баңгизаттарды сактоо боюнча кылмыш иштери козголуп, кармалгандар учурда абакка киргизилген. Жакын арада "Осьминог" кафесиндеги өрт боюнча дайындалган тиешелүү бардык экспертизалардын жыйынтыгы менен айыбы угузулат", - деп билдиришти ИИМден.