Интернетке порно видеосу тарады делинген декан: "Видео монтаж, аны мени менен мамилесин үзгөн адам жасаган"

Бүгүн, 23-январда Кыргыз улуттук консерваториясынын хор жана вокал бөлүмүнүн деканы Мария Шипулина өзүнө карата айтылган каралоолорго жооп иретинде жыйын өткөрдү. Ага Шипулина жана анын кесиптештери катышты.

Декандын айтымында, интернетке тараган видеону анын мурунку сүйүктүүсү тараткан жана ага тартылган башка айымдын жүзүнө атайын программа менен Шипулинанын жүзүн чапташтырып, монтаждаган.

"Бул видео тууралуу менин жакын кесиптештерим билишет. Чынын айтсам видеодогу жана сүрөттөрдөгү айым мен эмес, бул монтаж. Аны сайтка мени менен мамилесин үзгөн адам жүктөгөн. Ал биздин ортобуздагы мамиленин бузулушун туура эмес кабыл алып, өч алуу максатында ушундай кадамдарга барууда. Мени менен 6 жылга жакын чогуу өмүр сүргөн адамдан мындай ыплас нерсени күткөн эмесмин. Учурда териштирүү иштери жүрүп жаткандыктан анын аты-жөнүн айта албайм", - деди ал.

Белгилей кетсек, буга чейин айрым жалпыга маалымдоо каражаттарына кимдир бирөө тарабынан Кыргыз улуттук консерваториясынын хор жана вокал бөлүмүнүн деканы Мария Шипулина катышкан порно видео орустардын белгилүү порно сайттарынын бирине жүктөлгөнүн, аны декандын окуучулары гана эмес, кесиптештери, аталган окуу жайдын ректору, маданият министри, вице премьер-министр Чолпон Султанбекова жана башкалар биле тургандыгы жазылган кат келген. Аны жазгандар аталган окуу жайдын кызматкерлери экени баса белгиленген. Бирок териштирүүнүн алкагында, окуу жайда иштегендер эч кандай билдирүү таратпаганы аныкталган.