Ноокенде каракчылар чак түштө үй ээсинин келинин байлап, бир миллион сомдой акча сакталган сейфти уурдап кетишкен

Жалал-Абад облусуна караштуу Ноокен районунун Масы айылындагы үйлөрдүн бирине эки адам электрикпиз деп кирип, үй ээсинин келинин байлап, чак түштө бир миллион сомдой акча сакталган сейфти уурдап кетишкен. Бул тууралуу SUPER.KG`ге Жалал-Абад облустук ички иштер башкармалыгынын басма сөз кызматы билдирди.

Маалыматка ылайык, 19-январда күндүзгү саат 12:00 чамасында өздөрүн электр тармактар ишканасынан келгенин айткан эки жаран эсептегичти көрүп алуу өтүнүчү менен үйгө киришкен. Үй ээсинин келини 20 жаштагы М.А. дарбазасын ачар замат анын оозун жаап, үйгө алып кирип колу-бутун байлап, оозун скотчтоп салышкан.

Мындан тышкары келинди коркутуп, колундагы шакегин, сөйкөсүн алып, акча талап кылышкан. Андан соң үйлөрдү чачып, акча сакталып турган сейфти табары менен аны алып чыгып кетишкен. Үй ээлери милицияга сейфте катылган акча, зер буюмдардын баасы бир миллион сомго барабар болгонун билдирген.

"Бул окуядан кийин каракчылык беренеси боюнча кылмыш иши козголду. Кылмыштын бетин тез арада ачуу үчүн Жалал-Абад ОИИБинин жана Ноокен РИИБинин Криминалдык милиция кызматкерлеринен турган ыкчам тергөө тобу иш алып барууда", - деп билдирди маалымат кызматы.

Айрым маалыматтарга караганда, үй ээси базарда насыбай сатат.