Бишкектин 71 жаштагы тургуну бир килограммга жакын баңгизат менен кармалды

25-январда Бишкек шаарынын 71 жаштагы Б.М. аттуу тургуну 1 килограммга жакын баңгизат менен кармалды. ШИИББден маалымдашкандай, Бишкек шаарынын баңгизаттарга каршы күрөшүү кызматынын кызматкерлери кичи райондордун биринен шектүү жаранды кармашып, өздүк кароо жүргүзүшкөндө жанынан кара-күрөң түстөгү шектүү зат табылган. Алынган зат экспертизага жиберилип, жыйынтыгында жалпы салмагы 992 граммды түзгөн канабис баңгизаты болуп чыккан.

Бул факты боюнча Октябрь РИИБинин тергөө кызматы тарабынан Кыргыз Республикасынын Кылмыш-жаза кодексинин 246-беренеси менен кылмыш иши козголгон. Ошондой эле тергөөнүн жүрүшүндө кармалган жаран буга чейин ушул сыяктуу кылмыш иши менен соттолгондугу аныкталган.

Кармалган жаран убактылуу кармоочу жайга камалып, тергөө иштери жүрүп жатат.