Египетте адам органын сатууга шектелген дарыгерлер тобу кармалды

Египетте адам органын сатууга шектелген дарыгерлер тобу кармалды. Бул тууралуу бүгүн, 2-февралда чет элдик маалымат каражаттары жазышты.

Маалыматка караганда, дарыгерлер акчага муктаж болгон адамдар менен сүйлөшүүлөрдү жүргүзүп, кайсы бир органын сатууга көндүрүшкөн. Донор болууга макулдугун берген адам Каирге келип, анализдерин тапшырып бүткөнчө бир канча күн батирде жашап турган. Андан соң дарыгерлер тобунун биринин иш бөлмөсүндө болуп, кийин ал хирургдардын колуна өткөрүлгөн.

Жабырлануучулардын биринин айтымында, ал бөйрөгүн 1400 долларга сатууга макул болгон. Дарыгерлер операциядан мурун ага 300 доллар берип, калганын башка донор таап келсе гана беришерин айтышкан. Мындан улам ал башка донор таап келип гана, калган акчасын алып кете алган.

Учурда дарыгерлер тобунун бардык мүчөсү кармалып, жабырлануучулар көрсөтмө берип жатышат.