Казакстанда коррупцияга шектелген адам 4-кабаттан секирип кетип каза болду

Казакстанда коррупцияга шектелген адам 4-кабаттан секирип кетип каза болду. Бул тууралуу бүгүн, 7-февралда казакстандык маалымат каражаттары жазышты.

Маалыматка караганда, окуя 3-февраль күнү Талдыкоргон облусунда болгон. Анда Коррупцияга каршы улуттук департаменттин имаратынын 4-кабатындагы бөлмөлөрдүн биринин терезесинен "Казсуучарба" ишканасынын жетекчиси Сеилхан Мухамадиев секирип кеткен. Ал алган жаракатынан улам ошол жерден жан берген.

Коррупцияга каршы улуттук департаменттин иликтөөсүнүн натыйжасында, Талдыкоргон облусундагы "Казсуучарба" ишканасынын жетекчиси мамлекеттик сатып алуу иштеринде 17 миллион тенгени өз чөнтөгүнө жымырып алганы белгилүү болгон.

Учурда өзүн-өзү өлтүрүүгө жеткирүү боюнча кылмыш иши козголуп, иликтөө иштери жүрүп жатат.