Ош шаардык мэриясы: "Апасы тарабынан депкир менен сабалып каза болгон баланын сөөгүн жерге берүү боюнча сүйлөшүүлөр жүрүүдө"

Ошто энеси тарабынан сабалып, каза болгон наристенин сөөгүн жерге берүү боюнча шаардык мэрия иш алып барууда. Бул тууралуу Ош шаардык социалдык коргоо башкармалыгынын үй-бүлө жана балдарды коргоо бөлүмүнүн башчысы Гүлзина Раева бүгүн, 12-февралда SUPER.KG порталына билдирди.

"Учурда шектүүнүн ата-энеси менен сүйлөшүүлөр жүрүп жатат. Эгер алар сөөктү алууга макул болбосо, анда баланын денесин жерге берүүнү социалдык коргоо башкармалыгы жана шаардык мэрия өз колдоруна алат" - деди Раева.

Буга чейин баласын депкир менен эсинен тангыча сабаган делген 23 жаштагы келиндин ата-энеси табылып, бирок кызы менен байланышуудан баш тартышкандыгы маалымдалган.

"Шектүү келиндин өгөй энеси менен сүйлөшкөнүмдө алар кызынын төрөп алганын билбей турганын, анын бир нече жолу үйүнөн качып кетип, жаман окуяларга аралашканын айтышты. Ошондой эле атасы бул окуяны угуп ооруп калганын, ага байланыштуу бул окуяга аралашкылары келбей жатканын билдиришти", - деген Ош шаардык социалдык коргоо башкармалыгынын үй-бүлө жана балдарды коргоо бөлүмүнүн башчысы.

Эске салсак, Кара-Кулжа районунун 23 жаштагы тургуну өзүнүн 2 жаш 8 айлык баласын депкир менен эсинен тангыча сабагандыгы маалымдалган. Кийинчерээк өздүк булактар анын сойкулук менен алектениши мүмкүн экендигин билдиришкен. Ал эми дарыгерлер эсин жоготуп ооруканага түшкөн наристенин абалы оор экенин, анын денесинде ур-токмоктон калган эски тактар да бар болгонун айтышкан. Бул факты боюнча Ош шаардык ички иштер башкармалыгы тарабынан кылмыш иши козголуп, тергөөнүн жүрүшүндө аял баласын шымына сийип койгондугу үчүн сабаганын айткан. Кийин келиндин туугандары табылбай жатканын, анын жана баласынын эч кандай документтери жок экенин Ош шаардык социалдык өнүктүрүү башкармалыгынан маалымдашкан. Окуя болгондон 10 күн өткөндөн кийин наристе эсине келбей каза болгон.