Бишкекте өгөй ата 5 жаштагы кызды зордуктоого шектелүүдө. Шаар тургунунун айтымында, ошол учурда кыздын апасы толготуп төрөтканага кеткен

Бишкекте өгөй ата 5 жаштагы кызды зордуктоого шектелүүдө. Бул тууралуу SUPER.KG порталына Бишкек ШИИББинин басма сөз катчысы Адыл Оморов билдирди.

"Бул окуя 14-февралдан 15-февралга караган түнү катталган. Иш боюнча Кылмыш-жаза кодексинин 130-беренеси (сексуалдык мүнөздөгү зомбулук аракеттер) боюнча кылмыш иши козголду. Учурда шектүү убактылуу кармоочу жайга киргизилип, тергөө иштери жүрүп жатат", - дейт Оморов.

Ал эми кылмышка шектүү жаранды тааныган шаар тургуну Адилет Калыгулов буларга токтолду.

"Бул жарандын аялы төрөт үйүнөн көз жарып үйүнө келген соң 5 жашар кызынын абалын байкап ооруканага кайрылган. Дарыгерлер кыздын жыныстык кынында ажырым болгонун айтышып милицияга кабарлашкан. Бул жигит жарым жыл мурда тааныштарым аркылуу "4 балам бар, жашоом кыйындап кетти, колуңуздан келсе жардам кылып коюңузчу" деп мага келген. Эмне иш кылганды билесиң десем бардык жумушту кыла берерин айтты. Анан мен такси кызматында иштесин деп айдоочулук күбөлүгүнө акча берип, окуусун бүткөн соң машина алып бердим. Арадан бир жума өтпөй жатып, машинаны бузук абалында таштап кетип калган. Ортодо мага карыз болуп калды", - дейт Калыгулов.

Ошондой эле ал шектүү жаран 5 жашар кыздын апасынын үчүнчү жолдошу экенин, анын өкүл атасы милиция кызматкери болгондуктан чыгарып алуу аракеттери болуп жатканын кошумчалады.