"Ош базарындагы" өрт кайрадан мурда өрттөнгөн бөлүгүнөн чыкты (фото)

Бишкек шаарындагы "Ош базарындагы" өрт мурда өрттөнгөн "Сейтек" базарынан чыккан. Базардын өрт чыккан бөлүгүн милиция кызматкерлери курчоого алып, элди тилсиз жоо каптаган жерден алыстатып жатат. Бирок товары өрттөнүп жатканына чыдай албаган соодагерлер курчоодон өтүүгө аракет кылышууда. Курчоодон өтүүгө аракет кылган адамдарга тартип сакчылар өрт чыккан жерде газ баллондор бар экенин, жарылып кетүүсү мүмкүндүгүн эскертишүүдө. Өрттү Өзгөчө кырдаалдар министрлигинин кызматкерлери өчүрүүгө аракет кылып жатышканы менен улам күчөп жатат.

Ал эми өрт жалмап жаткан базарда соода кылган Мадина Тагаеванын айтуусуна караганда, кимдир бирөөлөр атайылап өрттөшү да мүмкүн.

"Менин соода ордум бут кийимдер сатылган катарда болчу. Азыр көрсөм бүт күйүп кетиптир. Өрт өзү эле чыккан жок, бир эле жерден кайра-кайра өрт чыкканынын өзү кызык. Менин оюмча, кимдир бирөөлөр атайылап өрттөп жатат. Мурда күйбөй калган бөлүгүн бүгүн өрттөп кетишти", - дейт Тагаев.

Соодагерлердин бири бул жерде килем жана таттуу саткан орундары болгонун айтат.

"Өрттөнүп жатат деп укканда эле саат 21:30 чамасында базарга келдик. Мурда ушул эле бөлүктүн Бейшеналиева көчөсүнө жакын жагы өрттөнгөн. Бүгүн калган бөлүгү өрттөнүп жатат. Албетте, таң калычтуу", - деди ал.