Кыргыз Республикасынын Эл артисти Ашырбек Чокубаевди акыркы сапарга узатуу зыйнаты болуп өттү

Кыргыз Республикасынын Эл артисти Ашырбек Чокубаевди акыркы сапарга узатуу зыйнаты бүгүн, 13-мартта Кыргыз улуттук драма театрынын алдында өттү. Ага мамлекеттик жетекчилер, Жогорку Кеңештин депутаттары, Казакстандын белгилүү актёрлору, кесиптештери жана туугандары катышты. Андан соң маркумдун сөөгү "Ала-Арча" көрүстөнүнө коюлду.

Театр жана кино актёру “Кожожаш”, "Курманжан датка" жана башка фильмдерде роль жараткан. Ал гана эмес, коңшу казак элинин бир далай тасмаларына түшүүгө жетишкен. Буга белгилүү “Көчмөндөр”, "Баатыр баяны", "Талаадагы куушмак" жана башка фильмдери далил боло алат.

Айта кетсек, Ашырбек Чокубаев 11-мартта каза болгон. Ал 1947-жылы 4-декабрда Өзгөн шаарчасында жарык дүйнөгө келген. Атасы кыргыздын белгилүү артисти Назарбек Чокубаев, апасы Турсун Чокубаева да театрда иштеген. Актёр Фрунзе шаарындагы №6, №9-орто мектептеринде билим алган. Мектепти аяктаган соң Москва шаарындагы Бүткүл Союздук кино тармагы боюнча институтун аяктаган. Жогорку билимге ээ болгондон кийин Кыргыз драма театрына актёр катары ишке кирген. Бүт өмүрүн актёрлукка арнаган Ашырбек Чокубаевдин артында Адыл жана Кылыч аттуу 2 уулу калды.