Түркияда киши колдуу болуп каза болушу мүмкүн делген 26 жаштагы кыргыз кыздын туугандары табылды

Түркиянын Денизли аймагында каза болгон 26 жаштагы Кыргыз кызынын туугандары табылды. Бул туурасында Тышкы иштер министрлигинин басма сөз кызматынан SUPER.KG порталына билдиришти.

"Маркумду интернет аркылуу туугандары билип, ата-энесине угузушту. Биз учурда Кыргыз өлкөсүнүн Түркиядагы элчилиги менен биргеликте иш алып барып жатабыз. Азыр иликтөө иштери жүрүп жатат", - дейт басма сөз кызматы.

Эске салсак, кыздын жансыз денеси 19-мартта эртең менен саат 9:40 чамасында Памуккале районундагы унаа жолунан табылган. Ал 1992-жылы туулган кыргыз кызы Ж.кызы Ы. болгон. Учурда бул боюнча Денизли прокуратурасы кылмыш ишин козгоду. Ал эми Тышкы иштер министрлиги алган маалыматтарга ылайык, учурда кыздын сөөгү Памуккале университетинин ооруканасынын өлүкканасында. Алдын ала маалыматтар боюнча, кызды унаа тебелеп каза болушу мүмкүн. Анын боору жана өпкөсү эзилип кеткен.

Ал эми чет элдик басылмалар маркум кыз муунтуп өлтүрүлүп, андан соң үстүнөн унаа тебелеп кеткенин жазышууда. Окуядан алыс эмес жерден каза болгон кызга таандык паспорт жана уюлдук телефон табылган. Анын жансыз денесин эртең менен талаадан келе жатышкан адамдар көрүп, полиция кызматына кабарлашкан.