Лейлектеги мыйзамсыз иштен мамлекет 201,5 миллион сом зыян тартты

Баткендин Лейлек районунда көмүр казуудагы мыйзам бузуулардан мамлекетке ири көлөмдөгү зыян келтирилгени аныкталды. Бул тууралуу Башкы прокуратура билдирди.

Маалымдалгандай, эки ишкана бөлүнүп берилген жер тилкелеринен тышкары, 100 миң 519 чарчы метрди түзгөн токой жеринин кыртышын мыйзамсыз бузушуп, 739 миң 494 чарчы метр көлөмүндө калдыктарды төккөн жана жаратылышты пайдалануу үчүн милдеттүү төлөмдөрдү төлөшкөн эмес.

Натыйжада, токой жерлерине 66 миллион 342 миң 540 сом зыян келтирилип, бюджетке 135 миллион 214 миң 453 сом түшпөй калган. Жалпы зыян 201 миллион 556 миң 993 сомду түзгөн.

Ошондой эле тиешелүү мамлекеттик органдардын жооптуу кызмат адамдары мыйзамсыз жүргүзүлүп жаткан иштерди өз убагында токтотушпай, ишканалардын мыйзамсыз иш жүргүзүүсүнө шарт түзүшкөн.

Бул фактылар боюнча Кылмыш-жаза кодексинин 337-беренеси (Кызмат абалын кыянаттык менен пайдалануу) жана 307-беренеси (Жер казынасын коргоо жана пайдалануу эрежелерин бузуу) менен кылмыш иши козголуп, учурда тергөө иштери жүрүүдө.