Москвада 14 Кыргыз кыз-келиндин өмүрүн алган өрт чыккан басмакананын директору абактан бошотулду

Москва шаарындагы "Печатный экспресс” басмаканасынын 2 жыл 6 айга эркинен ажыратылган директору Сергей Москвин абактан бошотулду. Мындай чечим 7-мартта Окуловск райондук соту тарабынан кабыл алынганын аталган мекеме расмий сайтына жазды. Андагы маалыматка караганда, Москвин мөөнөтүнөн мурда шарттуу түрдө абактан бошотуу боюнча арыз берип, сот каза болгон 17 адамдын жакындарынын каршылыгы жоктугунан анын өтүнүчүн канааттандырган.

Белгилей кетсек, 2016-жылдын 27-августунда Орусиянын Москва шаарынын түндүк-чыгышында жайгашкан басмаканадан өрт чыгып, 17 адам каза тапкан. Анын 14ү Кыргыз кыз-келиндер болгон.

Басмакананын директору Москвин өрт коопсуздугун сактаган эмес деген кине менен күнөөлүү деп табылып, 2017-жылдын август айында Бутурск райондук сотунун чечими менен 2 жыл 6 айга, башкы инженери Антон Яцков 3 жыл 6 айга шарттуу түрдө эркинен ажыратылышкан.