Ак-Ордо конушунда таш алдына көмүлгөн кыздын өлүмүнө шектелип таксист кармалды

Бишкек шаарынын четиндеги Ак-Ордо жаңы конушундагы жер тилкелердин биринде жансыз денеси ташка көмүлгөн кыздын аты-жөнү такталды. Бул тууралуу SUPER.KG порталына Чүй ОИИББинин басма сөз кызматынан билдиришти.

Маалыматка ылайык, киши колдуу болуп каза тапкан маркум 26 жаштагы Н.А. экендиги аныкталган. Ал Талас облусунда туулган.

"Сокулук районуна караштуу Ак-Ордо жаңы конушундагы жер тилкелердин биринен киши колдуу болуп каза тапкан кыздын жансыз денеси 24-мартта, таш алдына көмүлгөн жеринен табылган. Ыкчам иликтөө тобу тарабынан маркумдун туугандары, тааныштары изделип, текшерүүгө алынды. Жыйынтыгында, кылмышка шектүү катары жаңы конуштардын биринин тургуну 25 жаштагы Т.Б. кармалды. Алдын ала берилген маалыматтарга караганда, окуя өткөн жылдын декабрь айынын башында болгон. Маркум менен кылмышка шектүүнүн ортосунда уруш чыгып, окуя кыздын өлүмү менен аяктаган. Кылмышка шектүү сөөктүү жашыруу үчүн Сокулук районундагы үй салына элек жер тилкесине алып барып таш менен көмүп салган", - дейт басма сөз кызматынан.

Ошондой эле маалыматта шектүү менен маркум кыздын ортосунда жакын мамиле болгондугу айтылат. Ошондой эле Т.Б.нын таксист болуп иштегендиги аныкталган.

Өздүк булактардын SUPER.KG порталына билдирген маалыматына таянсак, маркумдун 5 жашар уулу бар. Туугандары аны көптөн бери издеп жүрүшкөн. Кечээ туугандары өлүкканадан сөөктү алып кетишкен.

Эске салсак, Бишкек шаарынын четиндеги Ак-Ордо жаңы конушундагы жер тилкелердин биринде таш менен көмүлгөн кыздын жансыз денеси 24-мартта табылгандыгы тууралуу маалымат чыккан.