Акыркы 5 жыл ичинде Орусияда эмгектенген Кыргыз жарандарынын саны 5 эсе өстү

Акыркы беш жыл ичинде Орусияда Кыргыз мигранттарынын саны дээрлик беш эсеге жогорулап, Армениянын жарандарынан эки эсеге көбөйгөн. Бул тууралуу Орусиянын Ички иштер министрлигинин маалыматына шилтеме берүү менен жергиликтүү басылмалар жазып чыгышты.

Маалыматтарга ылайык, 2017-жылы Орусияда 376 миң 863 Кыргыз жараны эмгектенген. 2012-жылы бул көрсөткүч 79 миң 375 болгон. Ал эми Орусияда эмгектенген армениялыктардын саны 2017-жылда 232 миң 247 деп катталган. Бул көрсөткүч 2012-жылы 90 миң 549 болчу. Эки өлкө тең Евразиялык экономикалык биримдикке (ЕАЭБ) мүчө.

Айрым өзгөчөлүктөрдү эске албаганда, биримдикке мүчө эки өлкөгө Орусия өзүнүн жарандары менен бирдей эмгек укуктарын берип келет. Тактап айтканда, Кыргыз жарандары да, Армения жарандары да Орусияда жумуш табуу үчүн патент алууга муктаж эмес.

Орусияда башка өлкөлөрдөн келип, патент алып эмгектенген мигранттардын саны 2012-жылдан 2017-жылга чейин 1 жарым эсеге көбөйгөн. Алдыңкы сапта Өзбекстан менен Тажикстандын жарандары болсо, үчүнчү орунда украиналыктар.

Белгилей кетсек, Кыргыз мамлекети 2015-жылдын август айынан тартып ЕАЭБге расмий түрдө мүчө болгон.