Ысык-Көлдө бороон болуп, малчынын 100дөй коюн кар күрткүсү басып калды

Ысык-Көлдө кар жаап, кийин бороон болуп, 1 малчынын үй-бүлөсү кар көчкүдөн өтө албай камалып калган. Анын 100дөй коюн кар күрткүсү басып калган. Бул тууралуу SUPER.KG порталына Ысык-Көл районунун акиминин орун басары Максат Сарбагышев тастыктады.

"Ысык-Көл районунун Чырпыкты айылынын жогору жагындагы бөксө тоолордо негизи эле шамал катуу жүрөт. Кечээ күнү кар жаап, кийин бороон болгондо катуу шамал учурган кар топтолуп күрткүлөр пайда болгон. Күрткү жолду да тосуп калып, айрым малчылар айылга өтө албай камалып калган. Күрткүгө камалган, бир үй-бүлөнү куткарып алып чыгышты. Ал үй-бүлө элдин малын чогултуп жайлоого чыкчу, бул жолу 600дөй кой алышкан экен. Алдын ала алынган маалыматтар боюнча, анын 100дөй кою күрткү алдында калыптыр", - дейт Сарбагышев.

Андан сырткары Сарбагышев учурда ал жерде ӨКМнын кызматкерлери жана жергиликтүү тургундар иш алып барып жатканын да кошумчалады.

Ал эми ӨКМнын басма сөз кызматынан кар күрткүсүнүн алдында калып 112 кой, 1 уй өлгөнүн билдиришти.