"Ичпечи балам, жок дегенде орозодо ичпечи…" деген сөзү үчүн уулу атасына бычак сайды

"Ичпечи балам, жок дегенде орозодо ичпечи…" деген сѳзү үчүн уулу атасына бычак сайды. Мындай кабарды SUPER.KG порталына Ош шаардык ички иштер башкармалыгынын басма сѳз кызматы билдирди.

Маалыматка ылайык, Ош шаарынын Ак-Буура милиция бѳлүмүнѳ 3-июнда саат 16:25те Ош шаарынын Ленинград кѳчѳсүнѳн ата-баланын ортосунда чыр чыгып жаткандыгы тууралуу кабар келип түшкѳн. Окуяны тактоо үчүн ал жерди тейлеген аймактык милиция кызматкерлери жѳнѳтүлгѳн.

"Аймактык инспектор барган учурда үй ээсинин баласы канжалаган кийимдери менен качууга камынып, эшикке жаңы чыккан. Милиция кызматкери үй ээсинин 32 жаштагы О.Б. аттуу уулун кармап, аны менен үйгѳ киргенде үй ээси, 57 жаштагы атасы канжалап жаткан. Милиция кызматкери алгачкы жардамды көрсөтүп, андан соң ыкчам-тергѳѳ тобун чакырган. Натыйжада жабырлануучунун ѳмүрүн сактап калууга мүмкүн болду", - деп жазылат маалыматта.

Тергѳѳ иштеринин алгачкы жыйынтыктарына ылайык, жабырлануучунун уулу алкоголдук ичимдиктерди кѳп ичкендиктен атасы ага "ичпечи балам, жок дегенде ыйык орозо күндѳрү ичпечи.." деп айткан. Анын сѳзү мас абалындагы баласын ачуулантып, ал ашканадагы бычакты алып, атасынын артынан барып, бычак менен моюнунан кесип жиберген. Анын кесепетинен атасы кѳп кан жоготуп, ѳз учурунда келген милиция кызматкери жана "Тез жардам" кызматынын жардамы менен гана ѳмүрү арачаланып калган.

"Жабырлануучунун берген кѳрсѳтмѳсүнѳ караганда, атасынын өмүрүнүн сакталып калышына милиция кызматкери менен "Тез жардамдан" тышкары бычактын мококтугу себеп болгон. Учурда атасынын ѳмүрүнѳ кол салган тургун Ош шаардык ички иштер башкармалыгынын убактылуу кармоочу жайына киргизилди. Тергѳѳ кызматы тарабынан "Адам ѳлтүрүүгѳ аракет жасоо" беренеси менен кылмыш иши козголду", - дейт маалымат кызматы.