Ошто 75 жаштагы улгайган аялды таянып жүргөн таягы менен сабаганга шектелип анын уулу кармалды

Ошто 75 жаштагы апасын сабаган деп шектелип анын уулу кармалды. Бул тууралуу Ош ШИИБинин басма сөз кызматы билдирди.

Маалыматка ылайык, 26-июнь күнү Ош шаарынын Абжалов көчөсүндөгү жашоочулардан маалымат келип түшкөн. Анда аталган көчөнүн тургуну өзүнүн карыган энесин ыйлатып, уруп жаткандыгы айтылган.

"Окуя болгон жерге барган Ош ШИИБинин оперативдүү тергөө тобу аталган көчөдө жашаган 41 жаштагы С.Э.ни кармашкан. Ал өзүнүн 75 жаштагы энесин мас абалда ур-токмокко алгандыгы маалым болду. Апасынын көрсөтмөсүндө баласы анын таянып жүргөн таягын колунан тартып алып сабаган. Жыгылып калган учурда, таяк менен муунтуп, "акча таап бересиң, болбосо өлтүрөм" деп коркуткан. Жабыркаган эне Ош облустук ооруканага жеткирилген. Энесин урган жаран мурда өзгөчө оор кылмышы үчүн (адам өлтүрүү) жаза мөөнөтүн өтөп келген. Кечээ күнү Ош шаардык соту кармалган жарандын баш коргоо чарасын карап, аны бир айга абакта кармоо чечимин чыгарды. Ош шаардык ички иштер башкармалыгынын тергөө кызматы тарабынан Кылмыш-жаза кодексинин 234-беренеси (бейбаштык) менен кылмыш иши козголду. Жабырлануучу энеге берилген соттук-медициналык экспертизанын жыйынтыгынан соң кылмыш беренеси өзгөрүшү мүмкүн", - деди маалымат катчы.