Ысык-Көлдө өтүп жаткан этнофестивалда бүркүт 10 жаштагы кызга кол салды

Ысык-Көл облусунун Тоң районунда өтүп жаткан этнофестивалда бүркүт 10 жаштагы кызга кол салды. Бул тууралуу режиссёр Эрнест Абдыжапаров SUPER.KG порталына билдирди.

"Окуя бүгүн, 15-июлда болду. Бүркүт кол салган кыз этнофестивалды уюштуруучу топ менен келген, тагыраагы, уюштуруучунун сиңдиси болот. Ал фестиваль башталгандан тарта эле биз менен жүргөн. Бүгүн бүркүт учуруу оюну болуп жатканда кыз кокусунан эле талаага чыга калган. Мындан улам бүркүт дароо кызга кол салган. Кыз бетин жаап калганга үлгүргөн. Биз дароо эле кызды аймактагы ооруканага алып бардык. Кыздын желкеси, далысы сыйрылган экен. Дарыгерлер жаракат алган жерлерин медициналык каражаттар менен жууп, тазалагандан кийин кыз үйүнө кетти. Учурда кыздын абалы канааттандырарлык", - дейт режиссёр.