Жалал-Абад ОИИБи: "Токтогулда майып кызды зордуктаган деген шек менен 1997-жылы туулган 2 бала камакка алынды"

Токтогулда ден соолугунун мүмкүнчүлүгү чектелген кызды зордуктаган деген шек менен 1997-жылы туулган 2 бала камакка алынды. Бул тууралуу Жалал-Абад ОИИБинин маалымат катчысы SUPER.KG порталына билдирди.

Буга чейин SUPER.KG порталына Токтогул районуна караштуу Өзгөрүш айылынын тургуну белгисиз адамдар анын кызын күч колдонуп зордуктап, ур-токмокко алгандыгы тууралуу айтып берген.

Бул боюнча Жалал-Абад ОИИБи төмөндөгүлөрдү билдирди:

"Токтогул РИИБине, аталган райондун Өзгөрүш айылынын Аң-Арык участкасынын тургуну 1971-жылы туулган Б.Г. арыз менен кайрылган. Анда 12-июль күнү болжол менен саат 18:00дөр чамасында Өзгөрүш айылынын Аң-Арык участкасындагы жайгашкан үйүнүн короосунун сыртынан 2001-жылы туулган Ө.кызы.А. аттуу
кызын белгисиз балдар ак түстөгү автоунаага салып кетишип, Токтогул районунун Жетиген айылынын Ак-Жар участкасындагы талаага алып барып саат 21:30дар чамасында унаанын ичинде эле кыздын эркине каршы күч колдонуп зордуктап койгондугун билдирип, мыйзам чегинде чара көрүп берүүнү суранган", - дейт маалымат катчы.

Арыздын негизинде 13-июль күнү Токтогул РИИБинин Тергөө кызматы тарабынан Кыргыз Республикасынын Кылмыш-жаза кодексинин 129-беренеси менен кылмыш иши козголуп, жүргүзүлгөн ыкчам иш-аракеттердин жыйынтыгында кылмышка шектүү деп Токтогул районунун Өзгөрүш айылынын тургундары 1997-жылы туулган Н.уулу.Ш. жана К.уулу.С. колго түшкөн. Кармалган жарандар күнөөлөрүн толугу менен моюнуна алышып, иликтөө иштери бүткөнгө чейин 2 айга камакка алынган.

Ал эми жабырлануучу тарапка соттук-медициналык экспертиза жана башка дагы тийиштүү эскпертизалар дайындалган. Азыркы күндө аталган кылмыш иши боюнча тергөө амалдары жүргүзүлүп, экспертизанын корутундусу күтүлүүдө.