98 Кытай жаранына жасалма Кыргыз паспортун бергендерге сот өкүмү чыкты

Ош шаардык соту жасалма документ жасоо иши боюнча чечим чыгарды. Бул тууралуу SUPER.KG'ге Ош облустук сотунун басма сөз кызматынан билдиришти.

Маалыматка караганда, Т.К.М. жана Х.М.Х. аттуу 2 Кыргыз жараны Я.М. аттуу Кытай жараны менен сүйлөшүүлөрдү жүргүзүп, Кыргыз жарандарын умрага арзан баада жөнөтүүгө жарыя беришкен. Алар 98 Кыргыз жаранынын паспортун чогултуп, виза ачтырып алган соң ар кыл себептерди айтуу менен паспортторду ээлерине кайтарып беришкен. Андан соң 98 жасалма Кыргыз паспорту жасалып, ага алынган визалар чапталып аларды Түркияга жеткиришкен. 2016-жылдын 18-майында 98 Кытай жаранын Кыргыз паспорту менен Сауд Арабияга умрага жөнөтүп жатканда Түркиянын укук коргоо органдары тарабынан кармалышкан.

Ош шаардык соту Т.К.М. аттуу жаранды "Документтерди, мамлекеттик сыйлыктарды, штамптарды, мөөрлөрдү, бланктарды кол менен жасоо, даярдоо, берүү же пайдалануу" беренесине ылайык күнөөлүү деп таап 6 жылга эркинен ажыратып, "Шарттуу соттоо" беренеси боюнча жазасы шарттуу деп табылып, 2 жыл сыноо мөөнөтү берилди.

Х.М.Х. аттуу жаранды "Документтерди, мамлекеттик сыйлыктарды, штамптарды, мөөрлөрдү, бланктарды кол менен жасоо, даярдоо, берүү же пайдалануу" беренеси менен 7 жылга күчөтүлгөн тартипте кармоо чечими чыгарылып, "Шарттуу соттоо" беренеси боюнча жазасы шарттуу деп табылып, 3 жыл сыноо мөөнөтү берилди.

Я.М. аттуу жаран "Документтерди, мамлекеттик сыйлыктарды, штамптарды, мөөрлөрдү, бланктарды кол менен жасоо, даярдоо, берүү же пайдалануу" беренесине ылайык 4 жылга эркинен ажыратылып, сот залынан камакка алынды.

Бүгүнкү күндө өкүмгө прокуратура тарабынан даттануу болуп, иш Ош облустук сотунда каралууда.