Бишкекте концертке кетип, эки жума бою дайынсыз жоголгон 17 жаштагы Кенжегүл Нарынбек кызы Ысык-Көлдөн табылды

Бишкекте концертке кетип, 2 жума бою дайынсыз жоголгон 17 жаштагы Кенжегүл Нарынбек кызы Ысык-Көлдөн табылды. Бул тууралуу бүгүн, 17-сентябрда SUPER.KG'ге анын бир тууган эжеси Алина Карымшакова билдирди.

"Сиңдим кечээ, 16-сентябрда үйгө кайтып келди, баары жакшы. Ал буга чейин Ысык-Көлдө жүрүптүр, кечээ жигитинин туугандары үйгө алып келип таштап кетишти. Алар "кызыңар балабыз менен сүйлөшүп жүрөт, бирок жашы жете элек экен. 18ге чыкканда ага сөйкө салып кетебиз" деп сүйлөшүп кетишти. Биз өзүнөн эмне кылып жүргөнүн сурасак, ал III Дүйнөлүк көчмөндөр оюндарын көрүүгө кеткенин, кийин жигитинин үйүнө барганын айтты. Арадан убакыт өтүп кеткендигине байланыштуу бизден коркуп, чалбай жүргөнүн билдирди. Анын үстүнө телефонун жоготуп жиберген экен. Буюрса, баары жакшы", - дейт кыздын эжеси.

Айта кетсек, Кенжегүл Нарынбек кызы 31-август күнү саат 21:30 чамасында "Ала-Тоо" аянтында өтүп жаткан концертти көрүү үчүн кеткен бойдон кайтып келген эмес. Саат 22:50 чамасында кыздын апасы телефон чалып, маршруттук таксилер токтоп каларын эскертип, эртерээк үйгө келүүсүн айткан.