Эмгек акысын ала албаган 46 Кыргыз жараны Түркиядан келе албай жатышат

Эмгек акысын ала албаган 46 Кыргыз жараны Түркиядан келе албай жатышат. Бул тууралуу SUPER.KG`ге мекенине келе албай жаткан жарандардын бири кабарлады.

"Жайкы туристтик сезондо "Фиеста сервис" компаниясы аркылуу Кемер шаарындагы мейманканалардын бирине жумушка орношконбуз. Учурда 3 айлык эмгек акыбызды ала албай жатабыз. Андан сырткары мекенибизге кетүү үчүн учак билеттерин сатып бериши керек эле. Мейманкананын жетекчилиги акчабызды жумушка орноштурган компания төлөп бериши керектигин айтышты. Компаниянын жетекчиси дайынсыз болууда.

Биз жумушка орношуу үчүн келишим түзүп жатканыбызда, "Фиеста сервис" компаниясы берген убадаларын аткарышкан жок. Бир нече ай шарты жок, 60 градуска чейин жеткен ысык бөлмөлөрдө кондиционери жок жашадык. Эми айлык акыбызды ала албай, мекенибизге кете албай жатабыз", - деди эмгек мигранты.

Бул тууралуу Тышкы иштер министрлигине кайрылганыбызда, Кемер шаары Стамбулдагы Кыргыз өлкөсүнүн башкы консулдугунун карамагында экенин, башкы консул жарандар менен жолугуп, алардын арызын уккандан кийин бир жыйынтык чыгарарын билдиришти.