Баткен ОИИБи: "Шамбесай" кениндеги окуя боюнча эч ким камалган жок, милиция кызматкерлери тартипти сактады"

Кадамжай районунун Майдан айылындагы “Шамбесай” алтын кенинде 23-октябрда жаңжал чыккан. Мекемелер аралык комиссиянын өкүлдөрү "Шамбесай" кенине иликтөө иштерин жүргүзүү максатында суу менен топурак алуу үчүн келишкенде жергиликтүү эл каршылык көрсөткөн.

Окуя болгон жерде тартылган видеодон милиция кызматкерлери аялдарды булкуп эки жакка түрткүлөп жатканын көрүүгө болот.

Бул боюнча Баткен облустук ички иштер бөлүмүнүн басма сөз кызматы "мекемелер аралык комиссиянын өкүлдөрү изилдөө жүргүзүү максатында суу жана топурак алыш үчүн кен казыла турган жерге келишкен. Бирок аны эл туура эмес түшүнүп, "мурда эле текшергенсиңер" деп тоскоолдуктарды жаратты. Абалды Үч-Коргон айылдык милиция бөлүмчөсүнүн милиция кызматкерлери көзөмөлдөп турду. Милиция кызматкерлери тоскоолдук жараткан жарандардан келген делегацияны алып чыгып кетишкен", - деп билдирди.

Ал эми милиция кызматкерлеринин аялдарды сүйрөп кетип жаткандагы көрүнүш боюнча "алар тартипти сакташты" деп кошумчалашты.