Кара-Сууда жашаган жаш келиндин жансыз денеси каналдан табылды. Коңшулары ал кумшекер төгүп алганы үчүн үйүндө жаңжал болгонун айтышууда

Өзбекстандын аймагындагы Шаркан-Сай каналынан 21 жаштагы келиндин жансыз денеси табылды. Бул тууралуу SUPER.KG порталына Ош облустук Ички иштер башкармалыгынын басма сөз кызматы кабарлады.

Маалыматка ылайык, маркум Ош облусундагы Кара-Суу районунда жашаган.

"Кызым 2-ноябрь күнү болжол менен саат 23:00дө үйдөн чыгып кеткен бойдон дайынсыз" деп келиндин атасы арыз менен кайрылган. Издөө иштеринин жыйынтыгында, 3-ноябрь күнү саат 16:00 чамасында Өзбекстандын Шаркан-Сай каналынан келиндин жансыз денеси табылган.

"Дайындалган экспертизанын жыйынтыгында күч колдонуу белгилери байкалган эмес. Бирок кошуналарынын айтымында, ошол күнү уруш-жаңжалдын үнү угулган. Коңшуларынын айтымында, келин кумшекер төгүп алгандыгы үчүн күйөөсү менен кайненесинен таяк жеген, андан кийин жол кире үчүн 20 сом сурап кеткен.

Мындан сырткары келиндин кайненеси жана ата-энеси телефон аркылуу урушканы дагы телефонго жазылып калган. Бул фактылардын негизинде "келинди өз өмүрүн кыюуга жеткирген" деген версия каралып жатат жана күбөлөр суралып, материалдар изилденүүдө. Аталган версия далилденсе, күйөөсү жана кайненеси кылмыш жоопкерчилигине тартылат", - деди басма сөз катчы.