Бишкек ШИИББи: "Тез жардамдын" фельдшери жана аны сабады делген адам бири-биринин үстүнөн арыз жазышты"

Буга чейин "Тез жардам" борборунун башкы дарыгери Искендер Шаяхметов мас абалындагы адам "Тез жардам" кызматынын фельдшерин чакырууга барган кезде сабаганын жана милиция кызматы ал адамды коё берип жибергенин билдирген.

Окуя тууралуу маалымат алуу боюнча Бишкек шаардык ички иштер башкы башкармалыгына байланышканыбызда, бул факт боюнча кылмыш иши козголгонун билдиришти.

"Милиция кызматкерлери тарабынан "Тез жардам" кызматынын фельдшери менен жарандын ортосунда пикир келишпестик болуп ал мушташка өткөнү аныкталды. Аталган факт боюнча Биринчи Май райондук ички иштер башкармалыгынын тергөө кызматы тарабынан Кылмыш-жаза кодексинин "Бейбаштык" беренеси менен кылмыш иши козголду", - деп билдиришти башкармалыктан.

Ошондой эле фельдшер да, мас абалында аны сабады делген тургун да бири-биринин үстүнөн арыз жазгандыгын башкармалыктан кошумчалашты.

Буга чейин Шаяхметов милициянын нөөмөттөгү кызматкери "Тез жардамдын" диспетчерине чалып, алардын чакырылган дарекке кеч барганын, чыр-чатакты өздөрү чыгарганын айтып, күнөөлөгөнүн билдирген. Бул боюнча Бишкек ШИИББинин маалымат катчысы: "Нөөмөттөгү кызматкер болгону абалды тактоо иретинде диспетчерге байланышкан, ак халатчандар чакырылган убакыт менен "Тез жардамдын" дарекке баргандагы убактысын айтып, кечирээк барышканын белгилеп койгон. Андан башка күнөөлөө болгон эмес", - деди.