Бишкек ШИИББи: "Бишкекте унаасына аялды камап алган таксист аны зордуктоого аракет кылган"

Бишкекте унаасына аялды камап алган таксистке карата кылмыш иши козголду. Бул тууралуу SUPER.KG порталына Бишкек шаардык Ички иштер башкы башкармалыгынын басма сөз кызматынан кабарлады.

Маалыматка ылайык, аялды унаасына камап алган таксист аны зордуктоого аракет кылган.

"Окуя 24-ноябрда Бишкектеги кичи райондордун биринде болгон. Таксинин айдоочусу 49 жаштагы Б.Ч. кечээ, 27-ноябрда кармалып, убактылуу кармоочу жайга киргизилген. Жабырлануучу аялдын жазган арызынын негизинде таксистке "зордуктоого аракет кылуу" беренеси боюнча кылмыш иши козголду", - деди шаардык милициянын басма сөз катчысы.

Эске сала кетсек, социалдык тармактарда унаада жардам сурап кыйкырган аялдын видеосу тараган. Интернет колдонуучулар белгисиз аялды унаасына камап алган таксистти жазага тартууну өтүнүшкөн.