Кичинекей баласы бар болгону үчүн кошуналарынан жаңжал чыгарбоону суранган атаны кошунасы бычак сайып өлтүргөн деп шектелүүдө

Сокулукта кичинекей баласы бар болгону үчүн кошуналарынан жаңжал чыгарбоону суранган атаны кошунасы бычак сайып өлтүргөн деп шектелүүдө. Бул тууралуу Чүй ОИИБинин басма сөз кызматы билдирди.

Маалыматка караганда, окуя 11-декабрда болгон. Милицияга кечки саат 18:25тер чамасында Новопавловка айылындагы үйлөрдүн биринде тургундун мыкаачылык менен өлтүрүлгөнү тууралуу билдирүү түшкөн. Көкүрөк тушуна жана ичине сайылган бычактан жаракат алып каза болгон адам 28 жаштагы Б.Т. аттуу Новопавловка айылынын жашоочусу экени аныкталган.

Кылмышка шектүү катары 34 жаштагы И.У. аттуу жаран колго түшүрүлгөн. Алдын ала маалыматтар боюнча, шектүү мас абалында аялы менен уруш чыгарган. Кошуналарына жаңжал угулуп тургандыктан, алар ымыркайы кичинекей экенин айтып, урушпоого чакырган. Шектүү кошунасы менен да уруша кетип, аны сыртка чакырган. Маркум эшикти ачар замат аны шектүү бычактап салган. Факты боюнча "адам өлтүрүү" беренеси менен кылмыш иши козголуп, шектүү тергөө абагына камакка алынды.