Чүйдө бир жарым жаштагы баланы апасы ажырашып кеткен күйөөсүнө калтырып кеткенде чоң энеси аялдамага алып барып таштаган

Чүйдө бир жарым жаштагы баланы аялдамага наристенин чоң энеси таштаган. Бул тууралуу Чүй ОИИББинин басма сөз кызматы билдирди.

Маалыматка ылайык, 10-декабрь күнү Чүй РИИБине Чүйдөгү аялдамалардын бирине наристе калтырылгандыгы тууралуу маалымат келип түшкөн. Окуя болгон жерге барган тергөө тобу баланын жашын аныкташкан.

"Бул факты Чүй РИИБинде катталып, наристе райондук аймактык ооруканага жеткирилген. Андан кийин Чүй РИИБинин жаш өспүрүмдөр менен иштөө инспекциясынын кызматкерлери баланын апасы Ысык-Ата районунун 23 жаштагы тургуну К.А. экенин аныкташкан. Ал кызматкерлерге баланын атасы 29 жаштагы С.Ч. менен 5 жылдай жарандык никеде жашаганын, ортолорунда 3 бала бар экендигин айткан.

"Ошондой эле ал жарандык никедеги күйөөсү менен бир жылдан бери жашабай калгандыгын, жокчулуктун айынан баласын күйөөсүнө берүү чечимин чыгарганын кошумчалаган. Бир жарым жаштагы наристени ал ушул жылдын 10-декабрь күнү күйөөсүнүн үйүнө келип таштап кеткен. Бирок баланын атасы да, туугандары да аны баккылары келген эмес. Мындан улам чоң апасы наристени айылдагы аялдамага таштап, андан соң милицияга кабар берип койгон. Бирок милиция кызматкерлерине баланы өзү таштаганын айткан эмес", - деп билдирет Чүй ОИИББи.

Ал эми Эмгек жана социалдык өнүктүрүү министрлиги бала тууралуу маалыматтар топтолуп жатканын билдирет.

"1 жарым жаштагы наристенин апасы баласы тууралуу эч кандай документ көргөзө алган жок. Ошондуктан бала Токмок шаарындагы балдар үйүнө которулду. Балага туулгандыгы тууралуу күбөлүк берүү каралууда. Эгерде балага тиешелүү документтер берилсе, ата-энесине кайтарып берүү маселеси каралат", - деди басма сөз кызматкери.

Буга чейин Чүй облусунун Бурана айылында бир жарым жаштагы наристени кийимдери менен аялдамага таштап кеткени маалымдалган. Наристени 10 күндөн бери эч ким издеп келген эмес.