Интернетте Ак Үйдүн алдына барып атайын түкүргөн жарандын видеосу тарады

Интернетте Ак Үйдүн алдына барып атайын түкүргөн жарандын видеосу тарады. Ал жогорку кызматта иштегендерге нааразычылыгын билдирип, андан соң Ак Үйгө түкүргөн.

"Мамлекет башчыларыбыз чыгарган мыйзамдар Кыргыз мамлекетин оңдой турган болсо, мен дагы өзүмдүн салымымды кошкум келип жатат. Мамлекетти уурдап, жеген, ичкен жана карызга батырган мамлекет башында иштеп кеткендердин, колунан эч нерсе келбей сүйлөгөндөрдүн урматына", - деп ал Ак Үйгө түкүрүп салды.

Жаран капчыгынан 5 500 сом алып чыгып "айып пулуңарды алып кеткиле" деди. "Жегич, сүйлөгөндөн башка колунан эч нерсе келбеген адамдардын бетине көптөн бери түкүргүм келип жүргөн. Ошондой мүмкүнчүлүк келди", - дейт ал.

Ички иштер министрлигинин басма сөз кызматы бул боюнча териштирүү иштери жүргүзүлүп жатканын SUPER.KG порталына билдирди. Ошондой эле басма сөз кызматы жарандын кылган аракети боюнча юридикалык баа бериле турганын маалымдады.

Эске салсак, 1-январда эреже бузуу жөнүндө кодекс ишке кирген. Анда коомдук жайларда түкүргөндөргө 5 500 сом айып пул салуу каралган.