Кылычбек Султан адилеттүүлүктүн жеңиши менен Сооронбай Жээнбековду да куттуктады

Бүгүн, 19-мартта Биринчи Май райондук соту Экономикалык кылмыштуулукка каршы күрөшүү кызматынын "Супер-Инфого" карата чыгарган токтомун жокко чыгарды. Сот Каржы полициясынын "Супер-Инфого" карата аракеттерин мыйзамсыз деп тапты. Буга чейин аталган гезитке карата басым жасалып жаткандыгын бир катар саясатчылар, партиялар жана партия лидерлери, укук коргоочулар, жарандык активисттер жана жалпыга маалымдоо каражаттары айтып чыгышкан.

Гезиттин жетекчилиги суракка чакырылгандан тартып соттук процесс аяктаганга чейин ага активдүү катышып жүргөн мурдагы элчи Кылычбек Султан соттун чечими "Супер-Инфонун" гана эмес, адилеттүүлүктүн жеңиши деп атады.

"Бүгүнкү соттун чечимин айрымдар "Супер-Инфонун" жеңиши деп жатышат, бирок мен буга кошула албайт элем. Бул - адилеттүүлүктүн жеңиши! Анткени адилеттүүлүк "Супер-Инфо" менен гана чектелип кала турган нерсе эмес, ал биздин коомубузга, адамзатка, кыргыз коомчулугуна керек.

"Бүгүн жасаган ишиң эртең өз башыңа муш" дегендей, бүгүн адилетсиздик орун алса, эртең ал сөзсүз өз кесепетин бермек. Адилеттүүлүк бар жерде ынтымак жана өнүгүү бар.

Негизи бул адилеттүүлүккө оңой менен жетишкен жокпуз. Ошондуктан коомдук активисттерге, "Бүтүн Кыргызстан" партиясына, КСДП партиясына, Равшан Жээнбеков, Адил Турдукулов, Рита Карасартова, Калыс Боромбаев, Мирбек Айтикеев, Жанар Акаев жана башка адилеттүүлүк үчүн кошо күрөшкөн жарандарга ыраазычылык билдирем. Мындан тышкары бир катар жалпыга маалымдоо каражаттарынын кошкон салымы болду, аларга да ыраазычылык билдиргим келет.

Бул күрөштө негизги фигуралар болгон сот Абдразак Боронбаевге, жактоочу Таалайгүл Токтакуновага ыраазычылык айтам. Жактоочу айыптоонун адилетсиздигин юридикалык жактан далилдеп берди. Жогоруда айтылган инсандарды, партияларды, ЖМКнын өкүлдөрүн, сотту, жактоочуну жана Сооронбай Жээнбековду да адилеттүлүктүн жеңиши менен куттуктагым келет.

Адилетсиз иш кылгандар эртеби же кечпи ал адилетсиздиктеринин азабын тартаарын жакынкы Кыргыз тарыхы жана дүйнө тарыхы далилдеп келе жатат", - деди Кылычбек Султан.