Украинанын президенттигине талапкерлер чогулган элдин алдында чөгөлөштү

Кечээ, 19-апрелде Украинанын президенттигине талапкерлер Володимир Зеленский менен Петро Порошенко 35 миң көрүүчү чогулган стадиондо дебат өткөрүштү. Алардын кайым айтышуусун түз эфир аркылуу миллиондогон көрүүчүлөр көрүп турушту.

Алгач Порошенко атаандашына кайрылып, анын Владимир Путиндин алдына чөгөлөөгө макул болгонун эскертти.

"Сиз Путиндин алдына чөгөлөп, кечирим сурайм дегенсиз. Сиз өзүңүздүн тамашаларыңызда Украинаны сойкуга теңегенсиз. Элден качан кечирим сурайсыз?" - деп суроо салды Порошенко.

Зеленский ага жооп иретинде, Украинада тынчтык болушу үчүн бардык нерсеге даяр экенин билдирди.

"Украинанын эли чөгөлөбөшү, Донбасстагы согуш токтошу үчүн орус президентинин алдына чөгөлөгөнгө даяр экенимди айткам. Мен уулу согуштан кайтпай калган ар бир эненин, өмүрлүк жолдошун согушта жоготкон ар бир аялдын алдына чөгөлөгөнгө даярмын. Сиз дагы ушундай кылыңыз" деген Зеленский чөк түшүп, чогулган элден кечирим сурады.

Порошенко да атаандашынын артынан кайталап, бирок арт жакта өлкөнүн желегин көтөрүп турган аялдын колун өптү.

Андан кийин Зеленский "Көрдүңүзбү, урматтуу Петро Алексеевич, адам болуу өтө деле кыйын эмес", - деди.

Украинада президенттик шайлоонун 1-туру 31-мартта өткөн. Алгачкы турдун жыйынтыгы менен эң көп добуш алган талапкерлер шоумэн Владимир Зеленский менен учурдагы президент Петро Порошенко 2-турга өткөн. Шайлоонун 2-туру 21-апрелде өтөт.