Абактан чыккан Мурат Суталинов: "Бүгүн боштондукка чыгам деп күткөн эмесмин"

"Бүгүн боштондукка чыгам деп күткөн эмесмин" деп абактан бошотулган Мурат Суталинов шаардык соттун чечими боюнча оюн айтты.

"Сот отурумдарында жабырлануучулардан кечирим сурагам. Мени кечиргени үчүн ыраазычылыгымды билдирем. 2010-жылдагы окуяны токтотконго күчүм жетпегени үчүн бүткүл кыргыз элинен кечирим сурайм. Мага колдоо көрсөткөн бардык адамдарга ыраазычылыгымды билдирем. Мен дарыгер кесибин тандабаганыма өкүнөм", - деди Суталинов.

Бүгүн, 7-майда Бишкек шаардык соту Улуттук коопсуздук кызматынын (азыр УКМК) мурдагы башчысы Мурат Суталиновду сот залынан боштондукка чыгарды. Ал бөйрөктүн 4-даражадагы рак оорусу менен жабыркап жатканы айтылган.

Мурат Суталинов 2006-2010-жылдары УКМКны башкарган. Ал "2010-жылы 7-апрелде митингге чыккан адамдарга каршы курал колдонгон жана кызмат абалынан ашыкча пайдаланган" деген айыптын негизинде 20 жылга соттолгон.