Бишкекте "Ильзат Ахметовдун кубогу" аталышындагы футболдук мелдеш өтөт

Бишкекте ЦСКА клубунун жана Орусия курама командасынын жарым коргоочусу Ильзат Ахметов футбол боюнча мелдеш өткөрөт. Бул тууралуу футболчу өзүнүн социалдык тармактагы баракчасы аркылуу кабарлады.

Маалыматка ылайык, мелдеш 24-майдан 28-майга чейин өтөт.

"Бала кезимден бери ар бир футболдук мелдешти өзүмдү сыноо үчүн мүмкүнчүлүк катары карачумун. Жараткан азыр мага мелдештерди уюштурууга мүмкүнчүлүк берди. Ошондуктан өзүмдүн мекенимде жаш таланттар үчүн футболдук мелдеш өткөрүүнү чечтим.

Ар бир машыктыруучуга, ар кандай кырдаалдарга карабай мага ишеним көрсөткөн окутуучуларыма ыраазычылык билдирем. Бул мелдешти өткөрүү менен алардын мага короткон эмгегинин бир бөлүгүн болсо да кайтарууга аракет кылдым. Мелдеш өзүм уюштуруп жаткан алгачкы иш-чара болуп жатат, бирок акыркысы эмес деп так айтып кете алам", - деп жазган футболчу.

Ахметов белгилегендей, мелдешке 2008-жылы төрөлгөн футболчулар катыша алат.

Ильзат Ахметов 1997-жылы Бишкек шаарында туулган. Алгач бишкектик "Алга" футболдук клубунда ойноп келген. 11 жашында үй-бүлөсү менен Орусияга көчүп барып, Юрий Коноплёвдун футбол академиясында тарбияланып баштаган. Андан соң Ильзат Ахметов "Рубин" футболдук клубу менен келишим түзүп, 16 жашында "Рубинде" дебют жасаган. 2018-жылы "ЦСКА" клубуна келип, азыркы учурда негизги оюнчусуна айланып, Чемпиондор Лигасында дагы беттештерге катышканга жетишти. Ушул жылдын 21-мартында Евро-2020 турниринин тандоо этабында Бельгияга каршы оюнда Орусия курама командасынын катарында дебют жасаган.