"Сакалымды кыра берип тажаганда жайына койдум" деген аял турмушка чыкты

Британиянын ITV телеканалына америкалык сакалчан аял келип, өзүнүн жашоосу тууралуу айтып берди.

Ал телеканалдагы берүүнүн алпаруучусуна "мени кичинекей аюу Шварц деп атагыла" деп сөзүн баштаган. Анын айтымында, көкүрөгүнө жана ээгине түк чыга берген азап менен 14 жашынан бери алышып келет. Мындай жагымсыз өзгөчөлүгүн башкалар билбеши үчүн төшүн жана ээгин күнүгө устара менен кырып келген.

31 жашында Шварц Сиэтлге көчүп келген дагы, сакалын кырбай коё берип койгон. Бул анын жашоосун оорлоткон: "Мени баары жалдырап карашат, көрүнөө эле каткырып, шылдыңдап өтүшөт. Акырын сүрөткө тартып алгандар да болот. Мунун баары мага абдан жагымсыз", - дейт ал. Мындай оорчулуктарга карабай, Шварц сакалын жашырбай өстүрүп келет. Ал тургай сакалчан аялдар арасындагы сынактын да жеңүүчүсү болгон.

"Менин сакалым эркектер менен мамиле түзүүмө тоскоолдук деле жаратпайт. Бирок узак убакытка чейин үй-бүлө куруп, бирге жашаганга мамиле түзүү үчүн түгөй табуу оор болду. Ким эле жанында бул менин аялым деп сакалчан аялды ээрчитип жүргүсү келсин?!" - деп Шварц өзүнүн абалын түшүндүргөн.

Шварц жаңы таанышууларды башынан өткөрүп, бирок үй-бүлө куруу үчүн түгөй таппай, жарым жыл жүргөндөн кийин социалдык тармактардын бириндеги баракчасына билдирүү жазган. Билдирүүсүнө Тобиас Брэдик аттуу 45 жаштагы адам көңүл бурган. Анын дагы сакалы бар, бирок кара эмес, саргыч сакал. Шварц анын сунушун кабыл алып, турмушка чыгууга макул болгон. Алар үлпөт тоюн өткөрүшүп, учурда бир үй-бүлө болуп жашап жатканын айтып беришкен.