Инстаграм эмне экенин түшүнө элек балдарына баракча ачкан жылдыздар

Инстаграм учурда популярдуу социалдык тиркеме экени талашсыз. Аталган тиркемени жашы да, карысы да колдонуп келет. Инстаграмга катталып, жеке баракча ачкандардын арасында бешиктен бели чыга элек, тагыраагы, социалдык тармактын эмне экенин түшүнө элек наристелер, жаш балдар да бар. Кыргыз шоу-бизнес өкүлдөрүнүн арасында наристесине же кичинекей балдарына Инстаграмдан баракча ачып бергендер дагы жок эмес.

Ырчы Жоодарбешим кызы Алсуга Инстаграмдан баракча ачкан. Алсу 1 жашта. Азырынча ал Инстаграм эмне экенин билбейт, бирок баракчасын ата-энеси карап, сүрөттөрдү жүктөп турат. Баракчага 2 миңден ашуун колдонуучу катталган.

Ал эми рэпер Баястан менен бийчи Зульфия кызы Наринэ үчөөнүн Инстаграм тиркемесинде өзүнчө баракчасы бар. Аталган баракчага үй-бүлөлүк сүрөттөр жарыяланып турат. "Азырынча бул баракча үчөөбүздүкү. Балким, кийин кызыбызга беребиз", - дейт ырчы. Үй-бүлөлүк баракчага 13 миңге жакын колдонуучу катталган.

Бийчи Максат Токтоналиевдин кызы Датка Айымга дагы баракча ачылган. Баракча Датка Айымдын сүрөттөрүн жана видеолорун сактоо үчүн колдонулат. Датка Айымдын баракчасына катталгандардын саны 3 миңге чукул.

Клипмейкер Эрнист Сыдыковдун 6 жаштагы Замир жана 5 жаштагы Умар аттуу балдарынын жеке баракчасы бар. Замирдин баракчасында 9 миңден ашуун, ал эми Умардын 4 миңден ашуун катталуучусу бар.

Ырчы Гүлзат Мамытбек 4 жаштагы кызы Анукага Инстаграм тиркемесинде жеке баракча ачып берген. Учурда анын баракчасында 3 миңден ашуун катталуучу бар.

Шоумен Актан Рыскелдиевдин 5 жаштагы Жантай жана 2 жаштагы Анатай аттуу уулдарын Инстаграмдан тапсаңыз болот. Улуу баласы Жантайдын баракчасында 8 миңден ашык, кичүүсү Анатайдын баракчасында 1 жарым миңге чукул катталуучу бар.

Мындан тышкары, Кыргыз Республикасынын Эмгек сиңирген артисти Самара Каримованын 7 жаштагы уулу Барсбек Элчиевдин дагы Инстаграм түйүнүндө баракчасы бар. Анын катталуучуларынын саны 25 миң.