Ош шаарынын атынан Таластагы көчмөндөр оюнуна катышып жаткандар 11 боз үй тигишти (фото)

Он бир боз үй, кол өнөрчүлөрдүн шаарчасы, этномода жана улуттук тамак-аштардын көргөзмөсү. Мындай жасалганы Ош шаарынын атынан Таластагы Улуттук көчмөндөр оюну өтүп жаткан жерге орнотушту. Маалыматты Ош шаардык мэриясынын басма сөз кызматынан билдиришти.

Маалыматка ылайык, 18-сентябрда Талас облусундагы "Манас ордо" комплексинде Улуттук көчмөндөр оюнунун урматына этношаарча ачылды. Анын ачылышында, Ош шаарынан келген өкүлдөр 11 боз үй тигишип, кол өнөрчүлөрдүн 15 кичи дүкөнү тигилди.

"Бул жылы Ош шаары өзүнүн кезегинде улуттук тамак-аштардын, улуттук кийимдердин көргөзмөсүн уюштурат. Ал эми чыгармачыл жамаат "Балага ат коюу" каадасын көрсөтүп берет. Жалпысынан Ош шаары 7 сынакка катышат. Ош шаары байыртадан бери эле кол өнөрчүлөрү менен даңкталып келген. Бул саамалыкта да кол өнөрчүлөр жараткан түрдүү кызыктуу буюмдар туристтерди жана конокторду кубантат", - деп жазылат маалыматта.

Улуттук көчмөндөр оюнунун маданий бөлүгүндө өлкөнүн 7 облусу жана Ош, Бишкек шаарлары өздөрүнүн чыгармачылыгын көрсөтүшөт. Алар театрлаштырылган көрсөтүүлөрдү коюшуп, облусун жакшы жагынан көрсөтөт. Маданий бөлүктөгү сынакта жалпы 2 миң киши катышат. Уюштуруучулардын айтымында, Улуттук көчмөндөр оюнуна 10 миң адамдын келүүсү күтүлүүдө.