ЖЭБди модернизациялоо иши: Сот менен жактоочулардын ортосунда түшүнбөстүк орун алды

Бүгүн, 28-октябрда Свердлов райондук сотунда ЖЭБди модернизациялоо боюнча кылмыш ишине байланыштуу соттук отурум уланууда.

Сот отурумуна Сапар Исаков, Евгений Хафизов жана Асанованын суракка келбегени үчүн сурак берүүдөн баш тарткан. Мурдагы өкмөт башчы мажбурлап алынып келинип, бирок конвойлордун бөлмөсүнөн чыкпай турганын жактоочу Замир Жоошев билдирген. Мындан улам учурда сот процесси Сапар Исаковдун катышуусуз өтүп жатат.

Соттук отурумдун жүрүшүндө судья менен жактоочулар арасында пикир келишпестик орун алды.
Мурунку өкмөт башчы Сапар Исаковдун жактоочусу Замир Жоошев айыпталуучу мажбурлап алып келүү тууралуу токтомду көрбөгөндүгүн айтты.
Ал эми Судья Инара Гилязетдинова жактоочунун бул пикирине тескери пикирин билдиридип, жактоочуга нааразы болду. Ал камерага кирип, айыпталуучуга түшүндүрүү иштерин жүргүзгөнгө милдетүү эмес экенин айтты.
Соттун жүрүшүндө жактоочу Жоошевге айыпталуучуга документти көрсөтүү мүмкүндүгү берилди. Мындан соң жактоочу Сапар Исаков күбөлөр- Евгений Хафизов менен Гүлбарчын Асанованы суракка алгандан кийин көрсөтмө беришин талап кылганын айтты.
Мындан улам судья жактоочуларга массалык маалымат каражаттары аркылуу коомчулуктун башын айландырып жатасыңар деп айыптады.
Айбек Калиевдин жактоочусу Бактыбек Жумашев сотко ММКларда жазылган маалыматка эмес, документке көңүл бурууну суранды.

Былтыркы жылы мурдагы өкмөт башчылар Сапар Исаков, Жантөрө Сатыбалдиев, мурдагы энергетика министри Осмонбек Артыкбаев, "Улуттук энергохолдинг" компаниясынын мурдагы төрагасы Айбек Калиев, анын ошол кездеги орун басары Жолдошбек Назаров, "Электр станциялары" ишканасынын мурдагы жетекчиси Салайдин Авазов жана ЖЭБди модернизациялоо долбоорунун мурдагы аткаруучу директору Темирлан Бримкулов камакка алынган.

Сот 2019-жылдын февраль айынан бери жүрүп жатат.