Илмияновдун жактоочусу анын 7 жылга камалышына макул эмес. Эми алар жогорку инстанцияга кайрылышат

Бүгүн, 30-октябрда Бишкектеги Октябрь райондук соту мурдагы президент Алмазбек Атамбаевдин кеңешчиси болгон Икрамжан Илмияновго козголгон кылмыш ишти кароону улантып, чечим чыгарды. Сот Илмияновдун мүлктөрүн конфискациялап, өзүн 7 жылга эркинен ажыратуу чечимин угузду.

Бул чечимге анын жактоочусу макул эмес. Айтымында, эми алар жогорку инстанцияга арыз менен кайрылышат. Буга чейин соттук отурумда көрсөтмө берип жатып, Илмиянов "мага айып негизсиз коюлуп жатат" деп айткан.

Алмазбек Атамбаевдин мурдагы кеңешчиси Икрамжан Илмияновго 150 миң доллар акча каражатын мыйзамсыз ээлеп алган деген айып тагылган.

2018-жылы Икрамжан Илмияновго УКМК тарабынан "алдамчылык" боюнча кылмыш иши козголуп, 18-октябрда сот аны сырттан камакка алуу чечимин чыгарган. 19-октябрда Илмиянов Орусиядан кармалган.

Илмияновдун кылмыш иши боюнча бардык кабарларды окуу үчүн ушул шилтемени басып өтүңүз.