Сот Илмияновду Беларусь ишкерине 10 миллион сом төлөп берүүгө да милдеттендирди

Бишкектин Октябрь райондук соту кечээ, 30-октябрда мурдагы президент Алмазбек Атамбаевдин мурунку кеңешчиси, камактагы Икрамжан Илмияновго карата чечим угузду. Сот Илмияновду күнөөлүү деп таап, анын үй-бүлөсүнө тиешелүү мүлктөрдү конфискациялоо, 160 миң сом өлчөмүндөгү айып салуу жана 7 жылга камакка алуу чечимин чыгарды.

Мындан сырткары, Илмиянов Беларусь ишкери Николай Грамовичке тиешелүү суммадагы акчаны төлөп берүүгө милдеттендирилди.

Бул тууралуу SUPER.KG порталына жактоочу Тынарбек Аскаров билдирди.

"Сот Беларусь ишкери Николай Грамовичдин пайдасына чечип, Илмияновду ага акча каражатын төлөп берүүгө милдеттендирди. 150 миң долларды сомго айландырганда 10 миллион 397 миң 235 сом болот экен. Сот ошол сумма Беларусь ишкеринин пайдасына өндүрүлсүн деди. Бирок бул сумманы Икрамжан Илмиянов алган эмес. Эми бул маселе дагы такталат. Күбөлөр ал акчалар шайлоого Беларусь тараптан демөөрчүлүк жардам катары берилгенин айтып жатышат. Биз жогорку инстанцияга ушул нерсени далилдеп, четке кагыш үчүн дагы кайрылабыз. Анткени бул жерде ошол акчаны Илмиянов жеке алып жатканын далилдеген видеофиксация, эч нерсе жок", - деди жактоочу Аскаров.