5 адамдын өмүрүн алган автокырсык. Аман калган жабырлануучулардын үчөө Бишкектеги ооруканага которулду

24-ноябрда Бишкек-Ош унаа жолунда адам өмүрүн алган жол кырсыгы катталган. Кырсыктын кесепетинен жабыркагандардын үчөө Жайыл райондук ооруканасынан Бишкектеги Травматология жана ортопедия илим изилдөө борборуна которулду. Бул тууралуу Саламаттыкты сактоо министрлигинин маалымат кызматынан билдирди.

"Кырсыктын кесепетинен жалпысынан 13 адам жаракат алган. Алардын үчөө (бирөө кичинекей бала) жеринен каза болсо, бир жабырлануучу ооруканага бара жатканда жан берген. Дагы бир жабырлануучу Жайыл райондук ооруканасынын жандандыруу бөлүмүндө каза болгон.

Аймактык оорукананын жандандандыруу бөлүмүндө жаткан бейтаптын абалы оор бойдон калууда. 3 бейтап Бишкектеги Травматология жана ортопедия илим изилдөө борборуна которулду. Ал эми Жайыл райондук ооруканасына дагы 2 жабырлануучу кайрылган", - дейт маалымат кызматынан.

Кырсыктын кесепетинен 5 адам каза болгон. Кечээ, 25-ноябрда Саламаттыкты сактоо министрлигинин басма сөз кызматынан 4 жабырлануучу медициналык текшерүүдөн кийин амбулатордук дарыланууга жөнөтүлгөнүн, дагы 4 бейтап аймактык ооруканада жатканын маалымдаган.