Ажылык зыяратка бара тургандарды каттоо эртең башталып, 30-декабрга чейин уланат

2020-жылдагы ажылык сапарга каттоо эртең башталып, 30-декабрга чейин уланат. Бул тууралуу Кыргыз өлкөсүнүн мусулмандар дин башкармалыгынан маалымат таратты.

Ажылык сапарга баруучу талапкерлерди каттоого алуу электрондук (Eid) ID-карт паспорттун негизинде жүргүзүлөт. Талапкерлер башкармалыктын түзүмүндөгү облустук, шаардык казыяттарда жана райондук бөлүмдөрдө, РСК банкына төлөнгөн алгачкы 500 доллар жана кайтарымсыз 700 сомдун төлөнгөн квитанциясынын негизинде каттоого алынмакчы.

Талапкерлерди ажылык серверге аймактык кезекке тургузуу бир гана алгачкы төлөгөн 500 доллар квитанциясынын негизинде жүргүзүлөт.

Ошондой эле муфтият 2020-жылы ажылыкка баруучу жарандар башкармалык тарабынан жарыяланган мөөнөттүн ичинде каттоодон өтүүсү тийиш экенин, андан кечиккен жарандар каттоого алынбай турганын эскертет.

Сауд Арабиясы Кыргыз өлкөсүнө 2019-жылдагы ажылык сапар үчүн 6 миң 10 квота бөлүп берип, зыяраттын баасы 3 миң доллар деп бааланган.

Буга чейинки зыяратка каттоо иши ушул жылдын 9-январынан 31-январга чейин жүргүзүлгөн.