"24.kg" сайтына Матраимовдор тараптан коюлган 15 миллион сом доо алынды, бирок арыз алынган жок

Бүгүн, 29-январда Бишкек шаарындагы Свердлов райондук сотунда Матраимовдордун "Азаттык", "Клооп" жана "24.kg" сайтынын үстүнөн жазган арызы боюнча сот отуруму уланды. Ага судья Жылдыз Ибраимова судьялык кылды.

Сот отурумунун башында сот доогер "24.kg" сайтынан доосун алгандыгы боюнча арыз жазганын айтты. Доогердин жактоочулары толуктоо киргизишип, эки тараптуу сүйлөшүүлөр болгонун, анда аталган басылма жазган темасына далил жок экенин айтып, төгүндөө боюнча макала жарыялаганын белгиледи. Сот бул өтүнүчтү канааттандырды.

"24.kg" басылмасынын өкүлү Эмил Жандаев доогер доосун жарым жартылай алды деп билдирди. "Биздин басылма маалыматты төгүндөгөн жок, тактоо киргизди. Доогер тарап төгүндөө деп түшүнсө түшүнө берсин", - деди ал. Журналисттердин кандай тактоо киргизди, төгүндөөдөн анын айырмачылыгы кандай деген суроосуна түшүндүрмө берген жок. Баары аталган сайтта жазылган деп билдирди ал.

Матраимовдорго жактоочулук кылып жаткан Канатбек Азиз "24.kg" менен өз ара сүйлөшүү болуп, анын негизинде ага моралдык зыян үчүн коюлган 15 миллион сом доодон баш тартышканын айтты. Доогердин өкүлдөрү аталган басылманын үстүнөн жазылган арыз алынбай турганын, юридикалык баа берилиши керектигин билдиришти.