170 адамдын өмүрүн алган коронавирус. "Памперс" кийип, чачын кырдырып иштеген медайымдар, отурган жеринен кулаган дарыгер

Ал эми "Network" басылмасы Шань Ся аттуу медайым коронавирусту жуктуруп албоонун амалын көрүп, чачын кырдырып салганын жазган. Маалыматта Шань Ся иштеген ооруканада медициналык кызматкерлердин 31и чачын кестирип салганы айтылат.

Тыгыз графикте иштеген медициналык кызматкерлер башын жууганга шарты жок экендигин, ага кошумча улук медайым чачты кыскартуу менен коронавирусту жугузуу коркунучу азаярын айтканын билдирген. "Мен өзүм деле чач жасалгамды өзгөртөйүн деп жүргөм. Албетте, кырдырам деген эмесмин. Бирок эч нерсе эмес, чач өсүп кетет", - деген ал.

Ал эми Шанхайдан келген Дин Шиин аттуу медайым азыркы күнгө чейин вирус жуктуруп алуудан корккону жазылган. "Мен Уханга келгенден бери коргонуу тууралуу көп ойлоном. Коргонуучу кийимди кантип кийип, чечүүнүн баарын жазып алгам. Кийинип жатканда майда-чүйдө нерсесине чейин унутпашым керек деп аябай дыкат карайм. Экинчи түнү коргонуудан катачылык кетирип албайын деп ойлонуп жатып, уктабай да чыктым" дейт медайым. "3 кабат кийимди кийүүнүн өзүнө эле жарым саат убакыт кетет. Кийинип алып вирус өрлөгөн аймакка киргенде баарын туура эле кийдикпи деп кайра бири-бирибизди кылдат текшерип чыгабыз", - деген Дин Шиин.

37 жаштагы ооруканада компьютердик томографияда отурган дарыгер аларга жөтөлгөн, калтырап баштаган (судороги) абалдагы бейтаптар келерин жана толук коргонууга шарт болбогондуктан кесиптештери да вирус жуктурганын айтат.

"10 күн мурун кесиптешим вирусту жуктуруп алып, отурган жеринен кулап түштү. Декабрь айынын аягында бизге вируска кабылгандар келип баштаган. Январдын башында бейтаптар көбөйө баштады. Адатта биз 60-80 кишини кабыл алчубуз. Январдын ортосунда күнүнө 300 адамды көрүүгө туура келди. Ажатканага барууга убакыт таппай жаттык. Азыр Ухан шаарынын бардык ооруканаларында ушундай абал", - дейт дарыгер. Ошондой эле ал январдын башында жөтөлүп баштагандан чочулап үй-бүлөсүн башка шаарга алып барып салганын жана шаарда коомдук транспорт жүрбөй калганына байланыштуу ооруканага велосипед менен 40 мүнөт жол жүрүп келип, кетерин билдирген.

Ал эми Ухан шаарындагы ооруканада иштеген 29 жаштагы анестезиолог Е Жи вирустун очогу болгон шаардагы абалды мындай сүрөттөйт. "Январда абал курчуду. Тез арада абал курчуп кеткендиктен биздин бөлүмдө коргоочу кийимдер, көз айнек жок болчу. Бир күнү операция бөлүмүндөгү хирург калтырап баштады. Томографиядан ал пневмония болуп калганы аныкталды. Ошол кезде бөлүмдө коронавируска шек жаралган бейтап жаткан болчу. Ага ошол бейтаптан жукса керек деп ойлоп калдык. Андан кийин дагы 3 дарыгер вирус жугузуп алганын билдим", - деп дарыгер да абалы коркунучта экенин билдирген.