Жактоочу: "Кой-Таш окуясы боюнча кармалгандардын баш коргоо чарасы түнкү саат бирге чейин каралды"

Кечээ, 3-февралда Бишкек шаарындагы Биринчи Май райондук сотунда Кой-Таштагы окуя боюнча кармалган адамдардын баш коргоо чарасын узартуу өтүнүчү каралды.

Анда Президенттик аппараттын мурдагы башчысы Фарид Ниязовго, экс-депутат Равшан Жээнбековго, экс-депутат Мээрбек Мискенбаевге, жарандык активист Фархат Баабиевге жана айдоочу Рыспек Карыпбек уулуна карата камактагы мөөнөтү 2020-жылдын 9-апрелине чейин узартылганы угузулду. Бул тууралуу SUPER.KG порталына жактоочу Замир Жоошев билдирди.

Жактоочунун айтымында, саат 15:00гө белгиленген соттук отурум кечки 19:00дө башталган.

"Процесстин жүрүшүндө Рыспек Карыпбек уулунун жактоочусу сотко ишенбөөчүлүк көрсөтүп, ишти башка сотко өткөрүп берүүнү талап кылды. Бирок кеңешүүдөн келген сот жактоочунун талабын канааттандырган жок. Ошону менен процесс түнкү саат 01:30да аяктады", - дейт жактоочу.