Кой-Таш окуясы боюнча айыпталып жаткандар: "Биздин соттук процесстер күндүз жана журналисттердин катышуусунда өтүшүн талап кылабыз"

Бүгүн, 4-февралда Кой-Таш окуясына байланыштуу айыпталып жаткан Равшан Жээнбеков, Канат Сагымбаев, Мээрбек Мискенбаев, Фархат Баабиев, Карыпбек уулу Рысбек жана Фарид Ниязовдун атынан коомчулукка кайрылуу жарыяланды. Алар сот жана укук коргоо органдары тарабынан басым жасалып жатканын билдиришет.

"ИИМ тарабынан жүргүзүлүп жаткан тергөө иштери бир тараптуу, бурмаланып, жалган уюштурулган көрсөтмөлөр менен коштолууда. Тергөө менен кызматташуу деген шылтоо менен ИИМ бийликтин саясий оппоненттерин, мурдагы президент Алмазбек Атамбаевдин жакын санаалаштарын камады. Биздин бардыгыбыздын сотторубуз жабык, жалпыга маалымдоо каражаттары киргизилбестен өтүүдө.

Соттор биздин соттук процесстерибизди түнкү саат 1ге чейин өткөрүүнү өнөкөт кылып алды. Биз соттун күндүз жана журналисттердин, жарандык коомдун өкүлдөрүнүн катышуусу менен өтүшүн талап кылабыз. Ак экенибизди ачык соттор аркылуу далилдейбиз", - деп жазылат кайрылууда.

Кечээ, 3-февралда Биринчи Май райондук сотунда жогоруда аты аталгандардын бөгөт чарасы каралып, алардын баары 9-апрелге чейин камакта калтырылган.