Кыйноолордун алдын алуу боюнча улуттук борбордун кызматкерлери блогер Сыдыманга жолугуп чыгышты

Кыйноолордун алдын алуу боюнча улуттук борборунун кызматкерлери "Сыдыман" каймана аты менен белгилүү болгон блогер Элмир Сыдымановго жолугуп чыгышты. Бул тууралуу аталган борбордун жетекчиси Нурдин Сулайманов билдирди.

"Биздин кызматкерлер бүгүн, 19-февралда убактылуу кармоочу жайынан Элмир Сыдымановго жолугушту. Ал эч кандай коркутуу-үркүтүү болбогонун айтты. Анын баш коргоо чарасында мамлекеттик жактоочу катышкан. Ал эми бүгүн өзүнүн жактоочусу Бишкек шаардык сотуна апелляциялык арыз менен кайрыла турганын айтты", - деди ал.

Кечээ, 18-февралда блогердин баш коргоо чарасы каралып, ал эки айга камакка алынган.

Белгилей кетсек, Сыдыман социалдык тармакта хейтерлери тууралуу айткан билдирүүсү коомчулуктун нааразычылыгын жараткан. 17-февраль күнү ал Октябрь РИИБинин экстремизм жана мыйзамсыз миграцияга каршы күрөшүү кызматы тарабынан 313-берененин (расалык, этникалык, улуттук, диний жана аймактар аралык кастыкты козутуу) негизинде кармалып, убактылуу кармоочу жайга киргизилген.