Импорттоочуларга жана экспорттоочуларга милдеттүү түрдө электрондук эсеп-кысап колдонуу мөөнөтү жылдырылды

Кыргыз Республикасынын Өкмөтүнүн токтому менен кошумча нарк салыгын төлөөчүлөргө, товарларды импорттоочуларга жана экспорттоочуларга милдеттүү түрдө электрондук эсеп-кысап колдонуу мөөнөтү 2020-жылдын 1-июлуна чейин жылдырылды. Бул тууралуу республикалык штабдан маалымдашты.

Маалыматка ылайык, көрсөтүлгөн мөөнөткө чейин 2019-жылдын 1-июлунда ишке кирген пилоттук долбоор ишке ашырылат. Чыныгы убакыт тартибинде маалыматтарды өткөрүү менен виртуалдык ККМ (контролдук кассалык машина) пайдалануу боюнча тесттик режим дагы ушул жылдын 1-июлуна чейин жылдырылды.

Мындан сырткары, мунай азыктарына электрондук товар-унаа коштомо кагазын милдеттүү түрдө колдонуу мөөнөтү 1-июлга жылдырылды.

Көрсөтүлгөн чаралар өлкө аймагында жарыяланган өзгөчө кырдаал жана айрым аймактарда өзгөчө абалдын киришине байланыштуу, ишкерлерди колдоо жана салык төлөөчүлөрдүн салык органдарына баруусун минималдаштыруу максатында кабыл алынды.