Коронавирус жок делинген Тажикстандагы ооруканалардын бири карантинге жабылды. Анда Кыргыз өлкөсүнө тойго келип кеткен жаран пневмониядан каза болгон

Өткөн аптада Тажикстанда коронавируска кабылгандар жок экенин Бүткүл дүйнөлүк саламаттыкты сактоо уюмунун өкүлү расмий билдирген. 5-апрелде өлкө бийлиги Согдий облусундагы Жаббор Расулов районундагы оорукананын бирин карантинге жапты. Карантинге жабылган ооруканада 31-мартта 60 жаштагы бейтап пневмониядан каза болгон. Маркум март айында Кыргыз өлкөсүнө үлпөт тойго келип кеткенин жакындары ырасташкан деп жазат тажик басылмаларынын бири.

Тажик басылмасынын маалыматына ылайык, 60 жаштагы бейтап каза болгондон кийин 5-апрелде 11 дарыгердин дене табы жогору болуп, инфекциялык ооруканага жаткырылган. Ал эми карантинге жабылган оорукананын башкы дарыгеринин абалы оор деп бааланып жатканы айтылууда.

Пневмониядан каза болгон жарандын жакындарынын айтымында, маркум үлпөт тойдон баргандан кийин дене табы жогорулап, оор абалда ооруканага жеткирилген. Дарыгерлер ага пневмония диагнозун коюшкан. 20-мартта бейтаптын абалы оорлошуп, оорукананын жандандыруу бөлүмүнө которулуп, 31-мартта каза болгон. Учурда маркум канча адам менен байланышта болгону тууралуу так маалымат айтыла элек. Бирок кеминде 13 адам коронавируска шектелип, ооруканада жатканы айтылат маалыматта.